1ܐܵܢܝܼ ܕܝܼܢܵܐ ܬܚܘܿܬ ܢܝܼܪܵܐ ܕܪܹܓܘܼܬܵܐ؛ ܠܐܵܓܼܵܝܵܝ̈ܗܝ ܐܲܝܟܼ ܕܚܵܫܚܝܼ ܠܟܠ ܐܝܼܩܵܪܵܐ ܕܵܒܼܩܝܼ؛ ܕܠܵܐ ܗܵܘܹܐ ܫܸܡܹܗ ܕܐܲܠܵܗܵܐ ܘܝܘܼܠܦܵܢܹܗ ܠܕܝܼܦܵܐ. 2ܘܐܵܢܝܼ ܕܐܝܼܬ ܠܗ݇ܘܿܢ ܐܵܓܼܵܝܹ̈ܐ ܡܗܘܼܡܢܹ̈ܐ؛ ܠܵܐ ܡܲܣܠܝܼ ܠܗ݇ܘܿܢ؛ ܣܵܒܵܒ ܕܐܵܚܘܿܢܘܵܬܵܝ̈ܗܝ ܝܢܵܐ؛ ܐܸܠܵܐ ܙܵܘܕܵܐ ܥܵܒܼܕܝܼ ܠܗ݇ܘܿܢ ܚܸܠܡܲܬ؛ ܣܵܒܵܒ ܕܡܗܘܼܡܢܹ̈ܐ ܝܢܵܐ ܘܡܘܼܚܸܒܹ̈ܐ ܐܵܢܝܼ ܕܝܼܢܵܐ ܫܵܪ̈ܝܼܟܹܐ ܗܲܪ ܒܗ̇ܝ ܛܵܒܼܬܵܐ. ܐܲܢܹܐ ܡܵܠܸܦ ܘܒܥܝܼ ܡܸܢܵܝܗܝ. 3ܐܝܼܢܵܐ ܐܸܢ ܐܝܼܬ ܐ݇ܢܵܫܵܐ ܕܡܵܠܸܦ ܝܘܼܠܦܵܢܵܐ ܐَܚܹܪَܢܵܐ؛ ܘܠܵܐ ܬܲܒܸܥ ܒܗܹܡܸܙܡܵܢܹ̈ܐ ܨܵܚ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܘܠܝܘܼܠܦܵܢܵܐ ܕܝܼܠܹܗ ܐܲܝܟܼ ܕܸܚܠܲܬ ܐܲܠܵܗܵܐ؛ 4ܐܵܗܵܐ ܟܹܐ ܡܵܪܸܡ ܓܵܢܹܗ ܟܲܕ ܡܸܢܕܝܼ ܠܹܐ ܝܲܕܸܥ؛ ܐܸܠܵܐ ܝܠܹܗ ܒܕܪ̈ܵܫܝܵܬܹܐ ܘܒܦܠܵܫܹ̈ܐ ܕܗܹܡܸܙܡܵܢܹ̈ܐ ܕܡܸܢܵܝܗܝ ܟܹܐ ܗܵܘܝܵܐ ܒܲܚܸܠܵܢܘܼܬܵܐ؛ ܘܡܲܩܲܪܵܨܘܼܬܵܐ؛ ܘܓܘܼܕܵܦܹ̈ܐ؛ ܘܚܫܵܒܼܝܵܬܹ̈ܐ ܒܝܼܫܹ̈ܐ؛ 5ܘܕܪ̈ܵܫܝܵܬܹܐ ܕܒܢܲܝ̈ܢܵܫܵܐ ܡܘܼܚܪܸܒܹܐ ܒܚܝܼܵܠ ܘܩܸܛܥܝܹܐ ܡ̣ܢ ܣܲܪܲܣܬܘܼܬܵܐ؛ ܕܒܸܚܫܵܒܼܵܐ ܝܢܵܐ ܐܘܼܪܚܵܐ ܕܩܢܵܝܬܵܐ ܝَܠܵܗ̇ ܕܸܚܠܲܬ ܐܲܠܵܗܵܐ. 6ܐܝܼܢܵܐ ܕܸܚܠܲܬ ܐܲܠܵܗܵܐ ܥܲܡ ܪܵܙܝܼܘܼܬܵܐ ܕܡ̣ܢ ܐܲܗܘܵܠ ܩܢܵܝܬܵܐ ܓܘܼܪܬܵܐ ܝَܠܵܗ̇. 7ܣܵܒܵܒ ܡܸܢܕܝܼ ܠܵܐ ܡܘܼܐܘܸܪܲܢ ܠܕܘܼܢܝܹܐ؛ ܘܡܲܥܠܘܼܡ ܝܼܠܵܗ̇ ܐܘܼܦ ܕܦܵܠܛܵܚ ܡܸܢܘܼܗ̇ ܠܹܐ ܡܵܨܵܚ. 8ܟܲܕ ܐܝܼܬ ܠܲܢ ܡܹܐܟܼܘܼܠܬܵܐ ܘܠܒܼܸܫܬܵܐ؛ ܡܵܠܝܼ ܠܲܢ. 9ܐܝܼܢܵܐ ܐܵܢܝܼ ܕܒܲܥܝܝܼ ܠܸܗܘܵܝܵܐ ܕܵܘܠܲܬܡܲܢܕܹ̈ܐ ܟܹܐ ܢܵܦܠܝܼ ܓܵܘ ܓ̰ܘܼܪ̈ܵܒܹܐ؛ ܘܓܵܘ ܢܸܫܒܹ̈ܐ؛ ܘܓܵܘ ܪܵܒܵܐ ܫܲܗ݇ܘܲܬܝܵܬܹ̈ܐ ܐܲܗܡܲܩܹ̈ܐ ܘܚܲܙܕܸܓܵܢܹ̈ܐ؛ ܘܟܹܐ ܡܲܛܒܥܝܼ ܠܒܢܲܝ̈ܢܵܫܵܐ ܒܬܠܵܩܵܐ ܘܐܲܒܼܕܵܢܵܐ. 10ܣܵܒܵܒ ܥܸܩܪܵܐ ܕܟܠܵܝܗܝ ܒܝܼܫܵܬܹ̈ܐ ܡܲܚܲܒܬܵܐ ܕܙܘܼܙܵܐ ܝَܠܵܗ̇؛ ܗ̇ܝ ܕܐ݇ܢܵܫܹ̈ܐ ܟܲܕ ܫܘܼܗ݇ܘܸܬܠܘܿܢ ܐܸܠܵܝܗܝ؛ ܡ̣ܢ ܗܲܝܡܵܢܘܼܬܵܐ ܚܠܸܛܠܘܿܢ؛ ܘܓܵܢܵܝܗܝ ܡܘܼܥܒܼܸܪܘܿܢ ܠܪܵܒܵܐ ܚܲܫܹ̈ܐ. 11ܐܝܼܢܵܐ ܐܲܢ݇ܬ؛ ܝܵܐ ܒܲܪܢܵܫܵܐ ܕܐܲܠܵܗܵܐ؛ ܡ̣ܢ ܕܐܲܢܹܐ ܥܪܘܿܩ؛ ܘܪܚܘܿܛ ܒܵܬ݇ܪ ܙܲܕܝܼܩܘܼܬܵܐ؛ ܘܕܸܚܠܲܬ ܐܲܠܵܗܵܐ؛ ܘܗܲܝܡܵܢܘܼܬܵܐ؛ ܘܚܘܼܒܵܐ ܘܚܡܵܠܬܵܐ؛ ܘܡܵܟܝܼܟܼܘܼܬܵܐ. 12ܦܠܘܿܫ ܦܠܵܫܵܐ ܛܵܒܼܵܐ ܕܗܲܝܡܵܢܘܼܬܵܐ؛ ܘܡܛܝܼ ܠܚܲܝܹ̈ܐ ܕܠܐܵܒܲܕ؛ ܕܐܸܠܵܝܗܝ ܦܸܫܠܘܿܟܼ ܩܸܪܝܵܐ؛ ܘܡܘܼܕܸܠܘܼܟܼ ܡܵܘܕܵܝܬܵܐ ܨܦܵܝܝܼ ܩܵܕ݇ܡ ܪܵܒܵܐ ܣܵܗܕܹ̈ܐ. 13ܒܝܼܵܗ݇ܒܼܵܐ ܝܘܸܢ ܣܵܗܕܘܼܬܵܐ ܐܸܠܘܼܟܼ ܩܵܕ݇ܡ ܐܲܠܵܗܵܐ؛ ܗ̇ܘ ܕܡܲܚܹܐ ܟܠ؛ ܘܝܼܫܘܿܥ ܡܫܝܼܚܵܐ؛ ܗ̇ܘ ܕܣܗܸܕܠܹܗ ܩܵܕ݇ܡ ܦܵܢܛܝܼܘܿܣ ܦܝܼܠܵܛܘܿܣ ܡܵܘܕܵܝܬܵܐ ܨܦܵܝܝܼ؛ 14ܕܢܵܛܪܸܬ ܠܹܗ ܦܘܼܩܕܵܢܵܐ ܕܠܵܐ ܡܘܼܡܵܐ ܘܕܠܵܐ ܠܵܘܡܵܐ؛ ܗܲܠ ܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ 15ܗ̇ܘ ܕܝܼܠܹܗ ܗܕܝܼܪܵܐ ܒܙܲܒܼܢܹܗ ܕܡܲܚܙܹܐ ܠܹܗ؛ ܗ̇ܘ ܕܝܼܠܹܗ ܡܒܘܼܪܵܟܼܵܐ ܘܚܲܝܠܬܵܢܵܐ ܒܢܲܦ̮ܫܹܗ؛ ܡܲܠܟܵܐ ܕܡܲܠܟܹ̈ܐ؛ ܘܡܵܪܵܐ ܕܡܵܪ̈ܵܘܵܬܵܐ؛ 16ܕܗܲܪ ܒܢܲܦ̮ܫܹܗ ܐܝܼܬ ܠܹܗ ܠܵܐ ܡܵܝܘܿܬܘܼܬܵܐ؛ ܘܟܹܐ ܥܵܡܸܪ ܒܒܲܗܪܵܐ ܐܲܝܢܝܼ ܕܐ݇ܢܵܫܵܐ ܠܹܐ ܡܵܨܹܐ ܕܩܲܪܒܸܢ ܐܸܠܹܗ؛ ܘܐ݇ܢܵܫܵܐ ܡ̣ܢ ܒܢܲܝ̈ܢܵܫܵܐ ܠܹܐ ܝܠܹܗ ܚܸܙܝܘܼܗܝ؛ ܐܘܼܦ ܠܹܐ ܡܵܨܹܐ ܠܸܚܙܵܝܘܼܗܝ؛ ܗ̇ܘ ܕܐܸܠܹܗ ܐܝܼܩܵܪܵܐ ܘܗܘܼܟܡܵܐ ܠܥܵܠܲܡ ܥܵܠܡܝܼܢ؛ ܐܵܡܹܝܢ. 17ܠܕܵܘܠܲܬܡܵܢܕܹ̈ܐ ܕܐܵܗܵܐ ܥܵܠܡܵܐ ܦܵܩܸܕ؛ ܕܠܵܐ ܪܵܝܡܝܼ ܒܚܝܼܵܠܵܝ̈؛ ܘܠܵܐ ܦܵܝܫܝܼ ܒܗܹܒܼܝܼ ܥܲܠ ܕܵܘܸܠܬܵܐ ܕܠܲܝܬ ܥܲܠܘܼܗ̇ ܗܹܒܼܝܼ؛ ܐܸܠܵܐ ܥܲܠ ܐܲܠܵܗܵܐ؛ ܗ̇ܘ ܕܝܸܗ݇ܒܼܵܚܠܹܐ ܟܠ ܡܸܢܕܝܼ ܒܕܵܘܠܲܬܡܲܢܕܘܼܬܵܐ ܠܒܘܼܣܵܡܲܢ؛ 18ܘܥܵܒܼܕܝܼ ܦܘܼܠܚܵܢܹ̈ܐ ܛܵܒܼܹ̈ܐ؛ ܘܗܵܘܝܼ ܕܵܘܠܲܬܡܲܢܕ ܒܫܘܼܠܹ̈ܐ ܫܵܦܝܼܪܹ̈ܐ؛ ܘܗܵܘܝܼ ܡܲܪ̈ܕܹܐ ܠܝܼܵܗ݇ܒܼܵܐ ܘܠܫܲܪܘܼܟܹܐ؛ 19ܘܡܲܬܒܼܝܼ ܒܚܲܙܝܼܢܵܐ ܠܓܵܢܵܝܗܝ ܒܸܢܝܲܬ ܛܵܒܼܬܵܐ ܠܡܸܢܕܝܼ ܕܝܼܠܹܗ ܗܕܝܼܪܵܐ؛ ܕܡܵܛܝܼ ܠܚܲܝܹ̈ܐ ܫܲܪܝܼܪܹ̈ܐ. 20ܝܵܐ ܛܝܼܡܵܬܲܐܐ؛ ܗ݇ܘܝܼ ܗܸܫܝܵܪ ܒܡܸܢܕܝܼ ܕܦܸܫܠܹܗ ܣܘܼܦܝܵܐ ܒܝܼܘܼܟܼ؛ ܘܥܪܘܿܩ ܡ̣ܢ ܗܹܡܸܙܡܵܢܹ̈ܐ ܒܵܛܝܼ̈ܠܹܐ ܘܗܲܪ̈ܙܹܐ؛ ܘܡ̣ܢ ܕܲܪܩܘܼܒܼܠܘܼܝܵܬܹܐ ܕܝܕܹܥܬܵܐ ܕܵܓܵܠܬܵܐ؛ 21ܗ̇ܝ ܕܐ݇ܢܵܫܵܐ ܐ݇ܢܵܫܵܐ ܟܲܕ ܡܵܘܕܘܿܝܘܼܗ̇؛ ܚܠܸܛܠܘܿܢ ܒܘܼܬ ܗܲܝܡܵܢܘܼܬܵܐ. ܫܵܦܵܩܲܬ ܥܲܡܵܘܟܼܘܿܢ؛ ܐܵܡܹܝܢ.